ନୂଆଦିଲ୍ଲୀ (୨୫.୧୧.୨୨) : ଶ୍ରଦ୍ଧାଙ୍କର ହତ୍ୟା ଘଟଣାରେ ସବୁବେଳେ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସୁଛି । ଶ୍ରଦ୍ଧାଙ୍କୁ ନିର୍ମମ ଭାବେ ହତ୍ୟା କରିବା ପୂର୍ବରୁ ତାଙ୍କୁ ଖୁବ୍ ନିର୍ଯାତନା ଦେଉଥିଲା ଅଫତାବ । ଶ୍ରଦ୍ଧାଙ୍କ ସାଙ୍ଗମାନେ ଏହି ଘଟଣାର ଖୁଲାସା କରିଛନ୍ତି । ଶ୍ରଦ୍ଧାଙ୍କ ବନ୍ଧୁ ରଜତ ଶୁକ୍ଳା କହିଛନ୍ତି ଯେ, ଅଫତାବ ସବୁବେଳେ ତାଙ୍କୁ ହଇରାଣ କରିବା ସହ ନିର୍ଯାତନା ଦେଉଥିଲା। ଏପରିକି ତାଙ୍କ ଦେହରେ ସିଗାରେଟ ଚେଙ୍କ ବି ଦେଉଥିଲା। ଗତବର୍ଷ ଶ୍ରଦ୍ଧା ଏ ନେଇ ନିଜର ଜଣେ ଘନିଷ୍ଠ ବାନ୍ଧବୀଙ୍କୁ ଜଣାଇଥିଲେ । ଏଥିସହ ଅଫତାବ ତାଙ୍କ ପିଠିରେ ସିଗାରେଟ ଚେଙ୍କ ଦେଇଥିବା କହିଥିଲେ। ଏହା ଜାଣି ଅନ୍ୟ ସାଙ୍ଗମାନେ ଉତ୍ତ୍ୟକ୍ତ ହୋଇ ଅଫତାବଙ୍କ ନିକଟକୁ ଯାଇ ତାଙ୍କୁ ଧମକ ଦେଇଥିଲେ। ଏପରିକି ଆଉ ଥରେ ଏପରି କାଣ୍ଡ କଲେ ଅବସ୍ଥା ସାଂଘାତିକ ହେବ ବୋଲି ବି ଚେତାବନୀ ଦେଇଥିଲେ। ହେଲେ ଶ୍ରଦ୍ଧା ଅଫତାବ ପ୍ରତି ନରମ ମନୋଭାବ ପୋଷଣ କରୁଥିଲେ ଓ ତାକୁ ଏକ ସୁଯୋଗ ଦେବାକୁ ଚାହୁଁଥିଲେ। ଯାହାର ପରିଣାମ ତାଙ୍କୁ ଭୋଗିବାକୁ ପଡ଼ିଲା ବୋଲି କହିଛନ୍ତି ତାଙ୍କ ସାଙ୍ଗ । ମେ’ ୧୮ ତାରିଖରେ ଅଫତାବ ଦିଲ୍ଲୀ ସ୍ଥିତ ଫ୍ଲାଟରେ ପ୍ରଥମେ ଶ୍ରଦ୍ଧାଙ୍କୁ ତଣ୍ଟିଚିପି ହତ୍ୟା କରିଥିଲା। ଏହାପରେ ତାଙ୍କ ମୃତଦେହକୁ ୩୫ ଖଣ୍ଡ କରି କାଟି ପକାଇଥିଲା। ଏହି ଖଣ୍ଡବିଖଣ୍ଡିତ ଶରୀରର ଅଂଶକୁ ୧୮ ଦିନ ଧରି ଅଫତାବ ଦିଲ୍ଲୀର ମେହରାଉଲି ଓ ଛତ୍ରପୁର ଅଞ୍ଚଳରେ ପର୍ଯ୍ୟାୟକ୍ରମେ ଫିଙ୍ଗି ଥିଲା।
ସିଗାରେଟ ଚେଙ୍କ ଦେଉଥିଲା ଅଫତାବ
Tags: aftab