ମମତାଙ୍କ ତୃତୀୟ ପାଳି ଆରମ୍ଭ

କୋଲକାତା-05.05.2021, ପଶ୍ଚିମବଙ୍ଗରେ ଲଗାତାର ତୃତୀୟଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେଲେ ମମତା ବାନାର୍ଜୀ । କରୋନା କଟକଣାରେ କୋଲକାତା ସ୍ଥିତ ରାଜଭବନରେ ମମତାଙ୍କ ଶପଥ ଗ୍ରହଣ ସମାପ୍ତ ହୋଇଛି । ରାଜ୍ୟପାଳ ଜଗଦୀପ ଧନଖର ମମତାଙ୍କୁ ଶପଥ ପାଠ କରାଇଛନ୍ତି । ତେବେ ଅନ୍ୟ କ୍ୟାବିନେଟ ମନ୍ତ୍ରୀ ସବୁ ମେ 9ରେ ଶପଥ ଗ୍ରହଣ କରିବେ । ଏହା ପରେ ମମତା ତାଙ୍କ କାର୍ଯ୍ୟାଳୟ ଅଭିମୁଖେ ଯିବେ ସେଠାରେ କୋଲକାତା ପୋଲିସ ମମତାଙ୍କୁ ‘ଗାର୍ଡ ଅଫ ଅନର’ ପ୍ରଦାନ କରିବେ। ଏଠାରେ ସୂଚନାଯୋଗ୍ୟ ଯେ, ପଶ୍ଚିମବଙ୍ଗରେ ନିର୍ବାଚନ ଫଳାଫଳ ପ୍ରକାଶ ପରେ ସେଠାରେ ରାଜନୈତିକ ହିଂସା ଦେଖିବାକୁ ମିଳିଛି । ହିଂସାରେ ପ୍ରାୟ 14 ଜଣଙ୍କ ମୃତ୍ୟୁ ଘଟିସାରିଲାଣି । ଏହା ବ୍ୟତୀତ ବିଜେପି କର୍ମୀଙ୍କୁ ବଳାତ୍କାର ଏବଂ ନିର୍ଯାତନା ଅଭିଯୋଗ ମଧ୍ୟ ରହିଛି ।