ନବରାତ୍ରୀରେ ଖାଆନ୍ତୁ ଏହି ସ୍ୱାସ୍ଥ୍ୟକର ଶାଗୁଦାନାର ଖେଚୁଡି

ଶାରଦୀୟ ନବରାତ୍ରୀ ପୂଜା ଆରମ୍ଭ ହୋଇଗଲାଣି । ଏହି ଅବସରରେ ମା ଦୁର୍ଗାଙ୍କର ୯ ରୂପର ପୂଜା କରାଯାଏ । ମାଙ୍କୁ ପ୍ରସନ୍ନ କରିବା ପାଇଁ କିଛି ଲୋକ ନବରାତ୍ର ବ୍ରତ କରିଥାନ୍ତି । ଏହି ବ୍ରତରେ ସନ୍ଧ୍ୟାରେ ହିଁ କିଛି ଖାଦ୍ୟ ଖିଆଯାଇଥାଏ । ଯେହେତୁ ଦିନ ସାରା ଉପାସ ରହିବାକୁ ହୋଇଥାଏ ତେଣୁ ଏପରି କିଛି ଖାଦ୍ୟ ଖାଇବା ଦରକାର ଯାହାଦ୍ୱାରା ଦିନସାରା ଶକ୍ତି ମିଳିବ । ଏହି ପରିସ୍ଥିତିରେ ଆପଣ ଶାଗୁ ଦାନାର ଖେଚୁଡି କରି ଖାଇପାରିବେ ।
ଶାଗୁ ଦାନାର ଖେଚୁଡି ବନେଇବା ପାଇଁ ଆବଶ୍ୟକ ହେଇଥିବା ସାମଗ୍ରୀ :
ଗୋଟାଏ କପ ଶାଗୁଦାନା, କଟାଯାଇଥିବା ଗୋଟିଏ ଆଳୁ, ୨ ଚାମଚ ଲେମ୍ବୁର ରସ, କିଛି ବାଦାମ ମଞ୍ଜି, ୫ରୁ ୬ଟି ଭୃସଙ୍ଗ ପତ୍ର, ଗୋଟିଏ ଲଙ୍କା, ଅଧା ଚାମଚ ସୋରିଷ , ଚାରି ଚାମଚ ଘିଅ, ୨ରୁ୩ଟି ଗୋଲମରିଚ ।
ପ୍ରଣାଳୀ
ସର୍ବପ୍ରଥମେ ଶାଗୁଦାନାକୁ ଚାରି ରୁ ପାଞ୍ଚ ଘଣ୍ଟା ପାଇଁ ପାଣିରେ ଭିଜେଇଦିଅନ୍ତୁ । ଏହାପରେ ପ୍ୟାନରେ ଘିଅ ପକାଇ ଗରମ ହୋଇଯିବା ପରେ ଏଥିରେ ସୋରିଷ ପକାନ୍ତୁ । ପରେ ଏଥିରେ ବାଦାମ ପକାଇ ୩ରୁ ଚାରି ମିନିଟ ପର୍ଯ୍ୟନ୍ତ ଭାଜନ୍ତୁ । ଏହାପରେ ଏଥିରେ ଭୃସଙ୍ଗ ପତ୍ର ଓ କଞ୍ଚା ଲଙ୍କା ପକାଇ ଅଳ୍ପ ସମୟ ଫ୍ରାଇ କରିସାରିବା ପରେ ଏଥିରେ ଆଳୁ ପକାନ୍ତୁ । ପରେ ଗୋଲ ମରିଚ ଓ ପାଣି ପକାଇ ଆଳୁ ସିଝିଲା ପର୍ଯ୍ୟନ୍ତ ଭଲ ଭାବରେ ଘୋଡାଇ ଦିଅନ୍ତୁ । ଏବେ ଏଥିରେ ଶାଗୁଦାନା ପକାଇ ଭଲ ଭାବେ ମିଶାଇ ଦିଅନ୍ତୁ ଏବଂ ତିନି ମିନିଟ ପର୍ଯ୍ୟନ୍ତ ଏହାକୁ ସିଝିବାକୁ ଦିଅନ୍ତୁ । ପରେ ଏହା ପ୍ରସ୍ତୁତ ହୋଇଯିବ ।