ପକୁଡି,ବରା ବିକି ପାଠପଢିବା ସହ ପରିବାର ପୋଷୁଛନ୍ତି ପ୍ରୀତି

ମୟୁରଭଞ୍ଜ(ଏଏନଏସ)୦୪/୦୫, ପ୍ରତ୍ୟେକ ମଣିଷ ବଞ୍ଚିବା ପାଇଁ ଓ ନିଜ ପରିବାର ପୋଷିବା ପାଇଁ କିଛି ନା କିଛି ସଂଘର୍ଷ କରିଥାଏ । ସେହିପରି ମୟୁରଭଞ୍ଜ ଜିଲ୍ଲାର ଶୁକୃଳି ବ୍ଲକ କୁମ୍ଭୀରଦା ଗାଁ ପ୍ରୀତି ଥୟାଲ ସଂଘର୍ଷ କରୁଛନ୍ତି ନିଜ ପାଇଁ ଓ ନିଜ ପରିବାର ପାଇଁ । ବୟସ ମାତ୍ର ୧୬ ବର୍ଷ । ପରିବାର କହିଲେ ବିଧବା ମା’ ଓ ସାନ ଭଉଣୀ । ମାତ୍ର ୧୧ ବର୍ଷ ବୟସରୁ ବାପାଙ୍କୁ ହରାଇଛନ୍ତି । ଆଉ ସେବେଠାରୁ ଆରମ୍ଭ ହୋଇଯାଇଛି ପ୍ରୀତିଙ୍କ ସଂଘର୍ଷପୂର୍ଣ୍ଣ ଜୀବନ । ବିଧବା ମା’ ଏବଂ ସାନଭଉଣୀର ଦାୟିତ୍ୱ ଏବେ ପ୍ରୀତି ଉପରେ । ବର୍ତ୍ତମାନ ସେ ଖିଚିଂ ମହାବିଦ୍ୟାଳୟରେ ଯୁକ୍ତ ଦୁଇ ପ୍ରଥମ ବର୍ଷର ଛାତ୍ରୀ । କଲେଜରୁ ପାଠପଢା ସାରି ଫେରିବା ପରେ ସନ୍ଧ୍ୟାରେ ନିଜ ଉଠାଦୋକାନକୁ ଚାଲିଆସନ୍ତି । ଏଥିରୁ ଯାହା କିଛି ରୋଜଗାର ହୁଏ ସେଥିରେ ତାଙ୍କ ପରିବାର କଷ୍ଟେମଷ୍ଟେ ଚଳିଯାଏ । ଅନ୍ୟପଟେ କେବଳ ରାସନ କାର୍ଡରେ ମିଳୁଥିବା ଚାଉଳକୁ ଛାଡିଦେଲେ ଅନ୍ୟ ସମସ୍ତ ସରକାରୀ ସୁବିଧାରୁ ସେ ବଞ୍ଚିତ । ମା’ ଓ ସାନଭଉଣୀ ସହ ଏକ ଛୋଟିଆ ଚାଳ ଘରେ ରୁହନ୍ତି । ସେହି ବରା ପକୁଡି ଦୋକାନରୁ ପରିବାର ପୋଷିବା ସହ ପାଠପଢି ଚାକିରି କରିବେ ବୋଲି ପଣ କରିଛନ୍ତି ପ୍ରୀତି । ତାଙ୍କର ପରିଶ୍ରମ କେବେ ବ୍ୟର୍ଥ ଯିବନି ବୋଲି କହିଛନ୍ତି ପ୍ରୀତି । ଏତେ କଁଅଳ ବୟସରେ କଠିନ ପରିଶ୍ରମ ଓ ଦୃଢ ଇଚ୍ଛାଶକ୍ତି ଆଗରେ ଦାରିଦ୍ର୍ୟତା ହାର ମାନିବାକୁ ବାଧ୍ୟ ହୋଇଛି । ଅବାସ ଯୋଜନାରେ ଘର ଏବଂ ଉଜ୍ଜଳା ଯୋଜନାରେ ଗ୍ୟାସ ପାଇବାକୁ ମଧ୍ୟ ଆଶା ରଖିଛନ୍ତି ସେ । ସରକାର ଏବଂ କେହି ବଦାନ୍ୟ ବ୍ୟକ୍ତି ପ୍ରୀତିଙ୍କୁ ସାହାର୍ଯ୍ୟ କଲେ ସେ ଭବିଷ୍ୟତରେ ଆଗକୁ ବଢିବାର ସାହାରା ପାଇପାରନ୍ତେ ।