ଡିସେମ୍ବର ୩୧ରେ ହେବ ସିବିଏସଇ ବୋର୍ଡ ପରୀକ୍ଷା ଘୋଷଣା, ଟ୍ୱିଟ କରି ସୂଚନା ଦେଲେ କେନ୍ଦ୍ର ଶିକ୍ଷାମନ୍ତ୍ରୀ

ନୂଆଦିଲ୍ଲୀ: କେନ୍ଦ୍ର ଶିକ୍ଷା ମନ୍ତ୍ରୀ ରମେଶ ପୋଖରିଆଲ ନିଶଙ୍କ ଡିସେମ୍ବର ୩୧ ସିବିଏସଇ ଦ୍ୱାରା ପରିଚାଳିତ ଦଶମ ଏବଂ ଦ୍ୱାଦଶ ବୋର୍ଡ ପରୀକ୍ଷା ତାରିଖ ଘୋଷଣା କରିବେ । ଏନେଇ କେନ୍ଦ୍ର ଶିକ୍ଷା ମନ୍ତ୍ରାଳୟ ପକ୍ଷରୁ ଟ୍ୱିଟ କରି ସୂଚନା ଦିଆଯାଇଛି । ଦେଶରେ କରୋନା ସ୍ଥିତିକୁ ଦୃଷ୍ଟିରେ ରଖି ଆସନ୍ତା ଫେବୃଆରୀ ମାସରେ ପରୀକ୍ଷା କରାଯିବ ନାହିଁ ବୋଲି ନିଷ୍ପତ୍ତି ନିଆଯାଇଛି । ଗତ ମଙ୍ଗଳବାର ଦିନ ମନ୍ତ୍ରୀ ଏକ ୱେବିନାରରେ ଯୋଗ ଦେଇ କହିଥିଲେ ଯେ, ବୋର୍ଡ ପରୀକ୍ଷା ଘୁଞ୍ଚାବାକୁ ଅଭିଭାବକମାନେ ଅନୁରୋଧ କରୁଛନ୍ତି । ପରୀକ୍ଷା କେବେ ହେବ ଏନେଇ କିଛି ସୂଚନା ଦେଇନଥିଲେ ମଧ୍ୟ, ସେ ସ୍ପଷ୍ଟ କରିଦେଇଥିଲେ ଯେ, ସିବିଏସଇ ବୋର୍ଡ ପରୀକ୍ଷାକୁ ଅଫଲାଇନ ମୋଡରେ ହିଁ କରାଯିବ । ଏହାର କାରଣ ହେଉଛି ଅନେକ ଗୁଡିଏ ପରୀକ୍ଷା କେନ୍ଦ୍ର ଗ୍ରାମାଞ୍ଚଳରେ ରହିଛି ତେଣୁ ଅନଲାଇନ ପରୀକ୍ଷାରେ ଛାତ୍ରଛାତ୍ରୀମାନେ ଅନେକ ସମସ୍ୟାର ସମ୍ମୁଖୀନ ହୋଇପାରନ୍ତି ଏବଂ ଛାତ୍ରଛାତ୍ରୀମାନଙ୍କ ଭବିଷ୍ୟତକୁ ନଜରରେ ରଖି ପରୀକ୍ଷାକୁ ବାତିଲ କରାଯାଇପାରିବ ନାହିଁ ଏହା ସେମାନଙ୍କ ପ୍ରତି ଅବିଚାର ହେବ । ତେଣୁ ପରୀକ୍ଷାକୁ କୌଣସି ମତ୍ତେ ରଦ୍ଦ କରାଯିବ ନାହିଁ ବୋଲି ୱେବିନାରରେ କହିଥିଲେ ମନ୍ତ୍ରୀ ।