ରାଜ୍ୟବ୍ୟାପୀ କଂଗ୍ରେସର ବିକ୍ଷୋଭ

ଭୁବନେଶ୍ୱର(ଏଏନଏସ)୦୫/୦୮, ଦେଶରେ ଦରବୃଦ୍ଧି ଚରମସୀମାରେ ପହଞ୍ଚିଥିବା ବେଳେ ଜନସାଧାରଣ ନାହିଁନଥିବା ଅସୁବିଧାର ସମ୍ମୁଖୀନ ହେଉଛିନ୍ତି । ଅତ୍ୟାବଶ୍ୟକୀୟ ସାମଗ୍ରୀର ଦରବୃଦ୍ଧି ଯୋଗୁ ମଧ୍ୟବିତ୍ତ ଓ ନିମ୍ନମଧ୍ୟବିତ୍ତତ୍ତପରିବାରର ସେମାନଙ୍କର ଗୁଜୁରାଣ ମେଣ୍ଟାଇବା କଷ୍ଟକର ହୋଇଥିବା ବେଳେ ବେଡି ଉପରେ କୋରଡା ସଦୃଶ ରନ୍ଧନ ଗ୍ୟାସର ମୂଲ୍ୟ ବୃଦ୍ଧି ମଧ୍ୟ ଅହେତୁକ ହୋଇଛି । କୋଭିଡ ପାଇଁ ଦେଶର ଅର୍ଥନୀତି ନିମ୍ନଗାମୀ ହେଉଥିବା ବେଳେ ଏହାର ପ୍ରତିବାଦରେ ରାଜ୍ୟ କଂଗ୍ରେସ ପକ୍ଷରୁ ପିସିସି ମୁଖ୍ୟ ଶରତ ପଟ୍ଟନାୟକଙ୍କ ନେତୃତ୍ୱରେ ଆଜି ରାଜଧାନୀଠାରେ ବିକ୍ଷୋଭ ପ୍ରଦର୍ଶନ କରାଯାଇଥିଲା । ଏହି ବିକ୍ଷୋଭ ପ୍ରଦର୍ଶନ ବେଳେ କେନ୍ଦ୍ର ସରକାରଙ୍କ ବିରୋଧରେ ଏକ ଶୋଭାଯାତ୍ରା ବାହାରି ରାଜ୍ୟପାଳଙ୍କ ଜରିଆରେ ଏକ ଦାବି ପତ୍ର ଦେବାକୁ ଯିବା ବେଳେ ପୋଲିସ ଓ କଂଗ୍ରେସ କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିବାର ଦେଖାଦେଇଛି । ବିକ୍ଷୋଭ ବେଳେ କଂଗ୍ରେସ ଦଳର ସମସ୍ତ ବିଧାୟକ ଓ ବରିଷ୍ଠ ନେତୃ ମଣ୍ଡଳୀ ଶୋଭାଯାତ୍ରାରେ ଯାଉଥିବାର ଦେଖାଯାଇଥିଲା ।