ନାହିଁ ପ୍ରମାଣ,ମିଳୁନି ଘର

ବରଗଡ, ବରଗଡ ଜିଲ୍ଲାରେ ଦେଖିବାକୁ ମିଳିଛି ବିଚିତ୍ର ସ୍ଥିତି । ଯୋଗ୍ୟ ହିତାଧିକାରୀ ସରକାରୀ ଯୋଜନାରୁ ବଞ୍ଚିତ ହେଉଛନ୍ତି । ପ୍ରାପ୍ତ ସୂଚନା ମୁତାବକ ଫେଲ ମାରିଛି ରାଜ୍ୟ ଓ କେନ୍ଦ୍ର ସରକାରଙ୍କର ପକ୍କା ଘର ଯୋଜନା । ପ୍ରକୃତ ହିତାଧିକାରୀ ଯୋଜନାରୁ ବଂଚିତ ହୋଇଛନ୍ତି ।ଏହା ହେଉଛି ବରଗଡ଼ ସଦର ଅନ୍ତର୍ଗତ ଖଳିଆପଲି ପଂଚାୟତର କେନାଲ ପଡା ଓ ସିଦ୍ଧେଶ୍ୱର ନଗରର କଥା । ଏହି ଗାଁରେ ପ୍ରାୟ ୪୮୦ ପରିବାର ଅନୁସୂଚିତ ଜାତି ଜନଜାତିର ଦୀର୍ଘ ୭୦ ବର୍ଷରୁ ଅଧିକ ସମୟ ଧରି ରହିଆସୁଛନ୍ତି । ଏମାନଙ୍କର ଭୋଟର ପରିଚୟ ପତ୍ର, ଆଧାର କାର୍ଡ ସହ ରାସନ କାର୍ଡ ମଧ୍ୟ ଅଛି ହେଲେ ଏମାନଙ୍କୁ ଏପର୍ଯ୍ୟନ୍ତ ନା ମିଳିଛି ବିଜୁ ପକ୍କା ଘର ନା ମିଳିଛି ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଖଣ୍ଡିଏ । ଏହି ଲୋକମାନେ କେନାଲ ଏରିଆରେ ରହୁଥିବାରୁ ଏମାନଙ୍କ ପାଖରେ ଜମିର ପଟ୍ଟା ନାହିଁ ତେଣୁ ଏମାନେ ପକ୍କା ଘର ଯୋଜନାରେ ସାମିଲ ହୋଇପାରିନାହାନ୍ତି । ଆଜି ଏହି ପ୍ରତିବାଦରେ ଗାଁର ଶହ ଶହ ମହିଳା ଓ ପୁରୁଷ ବରଗଡ଼ ବସଷ୍ଟାଣ୍ଡରୁ ଏକ ବିଶାଳ ରାଲି ବାହାରି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ଅତିରିକ୍ତ ଜିଲ୍ଲାପାଳଙ୍କୁ ଦାବି ପତ୍ର ପ୍ରଦାନ କରିଛନ୍ତି । ପ୍ରତ୍ୟେକ ଗରିବ ପରିବାରକୁ ବିଜୁ ପକ୍କା ଘର ଯୋଜନା କିମ୍ବା ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଖଣ୍ଡିଏ ପ୍ରଦାନ କରିବାକୁ ଦାବି କରାଯାଇଛି । ଦାବି ପୂରଣ ନହେଲେ ଆଗାମୀ ଦିନରେ ଭୟାବହ ଆନ୍ଦୋଳନ ସହ ରାଜରାସ୍ତାକୁ ଓଲ୍ହାଇବେ ବୋଲି ବିକ୍ଷୋଭକାରୀ ଧମକ ଦେଇଛନ୍ତି ।