ବରଗଡ -୨୧.୦୪.୨୦୨୧, ରାଜ୍ୟର କିଛି ଜିଲ୍ଲାରେ ଦେଖାଦେଇଛି ହାତୀ ଆତଙ୍କ । ବରଗଡ଼ ଗାଇସଲେଟ ବ୍ଲକ ଉମରାଡ଼ ଗାଁରେ ହାତୀ ଆକ୍ରମଣରେ ୩ ଜଣ ଯୁବକଙ୍କ ମୃତ୍ୟୁ ଘଟିଛି । ଆଜି ସକାଳ ସମୟରେ ଶୌଚ କରି ଯିବା ବେଳେ ହାତୀ ଆକ୍ରମଣର ଶିକାର ହୋଇଥିଲେ ଏହି ୩ଜଣ ବ୍ୟକ୍ତି । ହାତୀ ଦଳି ଦେବାରୁ ଘଟଣାସ୍ଥଳରେ ହିଁ ୩ଜଣଙ୍କ ମୃତ୍ୟୁ ଘଟିଥିବା ସୂଚନା ରହିଛି । ମୃତକମାନେ ହେଲେ -ଗ୍ରାମର ମାଲ ସେଠ, ବିରଞ୍ଚି କୁମ୍ଭାର ଓ ନାଲପାଲି ଗାଁର ଜଣେ ଯୁବକ । ଏନେଇ ଘଟଣାସ୍ଥଳରେ ଉତ୍ତେଜନା ସୃଷ୍ଟି ହୋଇଥିଲା ।
ସେହିପରି ବଲାଙ୍ଗିର ଜିଲ୍ଲା ଲୋହିଂସା ଦର୍ଲିପାଲି ଗାଁରେ ଶୌଚ ପାଇଁ ଯାଇଥିବା ବେଳେ ବିରଞ୍ଚି ସାହୁଙ୍କୁ ହାତୀ ଆକ୍ରମଣ କରିଥିଲା । ଯାହାଫଳରେ ଘଟଣାସ୍ଥଳରେ ବିରଞ୍ଚିଙ୍କ ମୃତ୍ୟୁ ଘଟିଥିବା ଜଣାପଡ଼ିଛି ।