ଏଏନଏସ: ରାଜ୍ୟରେ ପ୍ରଥମ ଥର ତାପମାତ୍ରା ଛୁଇଁଲା ୪୬ ଡିଗ୍ରି। ଏହି ସର୍ବୋଚ୍ଚ ତାପମାତ୍ରା ପଶ୍ଚିମ ଓଡ଼ିଶାର ଟିଟିଲାଗଡ଼ ଅଥବା ଝାରସୁଗୁଡ଼ାରେ ନୁହେଁ ବରଂ ଉପକୂଳବର୍ତ୍ତୀ ଜିଲ୍ଲା ବାଲେଶ୍ୱରରେ ଅନୁଭୂତ ହୋଇଛି। ବାଲେଶ୍ବରରେ ଆଜି ଦିନ ୨ଟା ୩୦ରେ ୪୬ ଡିଗ୍ରି ତାପମାତ୍ରା ରେକର୍ଡ ହୋଇଛି। ଏନେଇ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି।
ପାଣିପାଗ ବିଭାଗ ପକ୍ଷରୁ କୁହାଯାଇଛି ଯେ, ବାଲେଶ୍ବର ପରେ ରାଜଧାନୀ ଭୁବନେଶ୍ବରରେ ଦ୍ବିତୀୟ ସର୍ବାଧିକ ତାପମାତ୍ରା ରେକର୍ଡ ହୋଇଛି। ଭୁବନେଶ୍ୱରରେ ଆଜି ୪୫.୪ ଡ଼ିଗ୍ରି ପାରା ଛୁଇଁଛି। ସେହିଭଳି ଝାରସୁଗୁଡାରେ ୪୪.୨ ଡ଼ିଗ୍ରି, ଚାନ୍ଦବାଲିରେ ୪୩.୬ ଡ଼ିଗ୍ରି, ରାଉରକେଲାରେ ୪୩.୨ ଡ଼ିଗ୍ରି, ସମ୍ବଲପୁରରେ ୪୩.୨ ଡ଼ିଗ୍ରି, କେନ୍ଦୁଝରରେ ୪୩ ଡ଼ିଗ୍ରି, ପୁରୀରେ ୩୫.୧ ଡ଼ିଗ୍ରି, ଗୋପାଳପୁରରେ ୩୩.୬ ଡ଼ିଗ୍ରି ଓ ପାରାଦୀପରେ ତାପମାତ୍ରା ୩୩.୬ ଡ଼ିଗ୍ରି ଅନୁଭୂତ ହୋଇଛି।
ପାଣିପାଗ ବିଭାଗ ପକ୍ଷରୁ କୁହାଯାଇଛି ଯେ, ଆହୁରି ୩ ଦିନ ଆକାଶରୁ ଅଗ୍ନିବର୍ଷା ହେବ। ରାଜ୍ୟରେ ଗ୍ରୀଷ୍ମପ୍ରବାହ ସହ ଗୁଳୁଗୁଳି ଜାରି ରହିବ। ଗ୍ରୀଷ୍ମ ପ୍ରବାହ ଯୋଗୁଁ ପାଣିପାଗ ବିଭାଗ ରାଜ୍ୟର ଅନେକ ଜିଲ୍ଲାକୁ ରେଡ ଆଲର୍ଟ ଜାରି କରିଛି।
