ଗଞ୍ଜାମ ଜିଲ୍ଲାରେ ଡିଇଓଙ୍କ ମନୋମୁଖୀ କାର୍ଯ୍ୟ

ବ୍ରହ୍ମପୁର(କୃଷ୍ଣଚନ୍ଦ୍ର ପାଲ), ଗଞ୍ଜାମ ଜିଲ୍ଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟରେ କିରାଣୀ ମାନଙ୍କ ନିଯୁକ୍ତି ନେଇ ବିଭିନ୍ନ ଅଭିଯୋଗ ହେଉଥିବାବେଳେ ନିରବଦ୍ରଷ୍ଟା ସାଜିଛି ରାଜ୍ୟ ଗଣଶିକ୍ଷା ବିଭାଗ । ମଞ୍ଜୁରିପ୍ରାପ୍ତ ପଦବୀଠାରୁ ଅଧିକ ସଂଖ୍ୟକ କିରାଣୀଙ୍କୁ ଡେପୁଟେସନରେ ଆଣି ଜିଲ୍ଲା ଶିକ୍ଷାଅଧିକାରୀଙ୍କ କାର୍ଯ୍ୟାଳୟରେ ନିୟୋଜିତ କରାଯାଉଛି । ଡେପୁଟେସନରେ ଆସିବା ପାଇଁ ଓ ଡେପୁଟେସନରେ ନଆସିବା ପାଇଁ ଏହି କାର୍ଯ୍ୟାଳୟରେ ନିଲାମ ଚାଲିଛି । ଯେଉଁ କିରାଣୀମାନେ ଦୀର୍ଘଦିନ ଡେପୁଟେସନରେ ଅଛନ୍ତି ଓ ନିୟମିତ ମଞ୍ଜୁରୀପ୍ରାପ୍ତ ପଦବୀରେ ଚାକିରି କରିସାରିଛନ୍ତି ସେମାନଙ୍କୁ ଅନ୍ୟତ୍ର ବଦଳି କରାଯାଉନାହିଁ କିମ୍ବା ଡେପୁଟେସନ ବାତିଲ ମଧ୍ୟ ହେଉନାହିଁ । ଡି.ଇ.ଓଙ୍କ ଅବହେଲା ଏଥିପାଇଁ ଦାୟୀ ବୋଲି ଶିକ୍ଷକ ସଂଘ ପକ୍ଷରୁ ବାରମ୍ବାର ଅଭିଯୋଗ ହେଉଛି । ୨୦୧୯ ସେପ୍ଟେମ୍ବର ମାସଠାରୁ ବଦଳ ହୋଇଥିବା କର୍ମଚାରୀଙ୍କ ଡେପୁଟେସନ ବାତିଲ ହୋଇନାହିଁ କିମ୍ବା ତାଙ୍କୁ ଡି.ଇ.ଓ ଙ୍କ କାର୍ଯ୍ୟାଳୟରୁ ରିଲିଭ ନକରିବା ଫଳରେ ବସ୍ତୁତଃ ସେମାନେ ସେହି କାର୍ଯ୍ୟାଳୟରେ କାମ କରୁଛନ୍ତି । ଗଞ୍ଜାମ ଡି.ଇ.ଓ ଜନୈକ ଏକ କିରାଣୀଙ୍କ ଆସ୍କା ବିଇଓଙ୍କ କାର୍ଯ୍ୟାଳୟରୁ ଆଞ୍ଚଳିକ ମାଧ୍ୟମିକ ଶିକ୍ଷା କାର୍ଯ୍ୟାଳୟ ବ୍ରହ୍ମପୁରକୁ ଡେପୁଟେସନର ଆଦେଶ ଦେଇଛନ୍ତି । ଏଠାରେ ସୂଚନାଯୋଗ୍ୟ ଯେ, ଫେବୃଆରୀ ୨୦୨୦ ଠାରୁ ଉକ୍ତ କିରାଣୀଙ୍କ ଡେପୁଟେସନ ପାଇଁ ଧନ୍ଦାମୂଳକ ଶିକ୍ଷା ନିର୍ଦ୍ଦେଶକଙ୍କ ସୁପାରିଶ ଥିଲେ ମଧ୍ୟ ତାକୁ କାର୍ଯ୍ୟକାରୀ କରାଇ ଦେଉନାହାନ୍ତି ଡିଇଓ । ଏହାର ପୁଙ୍ଖାପୁଙ୍ଖନ ତଦନ୍ତ କରି ସଂପୃକ୍ତ ଡିଇଓଙ୍କୁ ଅନ୍ୟତ୍ର ବଦଳି କରିବା ସହ ଏକ ସଚ୍ଚୋଟ ଅଫିସରଙ୍କୁ ଡିଇଓ ଭାବେ ନିଯୁକ୍ତ ଦେବାକୁ ଗଞ୍ଜାମ ଶିକ୍ଷକ ସଂଘ ପକ୍ଷରୁ ଦାବି କରାଯାଇଛି ।