ନୂଆଦିଲ୍ଲୀ, ନିର୍ବାଚନ କମିଶନ ପଦରୁ ଇସ୍ତଫା ଦେଇଛନ୍ତି ବରିଷ୍ଠ ଆଇଏଏସ ଅଧିକାରୀ ଅଶୋକ ଲାଭାସା । ସେ ସେପ୍ଟେମ୍ୱର ମାସରେ ଏସୀୟ ବିକାଶ ବ୍ୟାଙ୍କ (ଏଡିବି)ର ଉପ-ସଭାପତି ଭାବେ ଦାୟିତ୍ୱ ଗ୍ରହଣ କରିବେ । ନିର୍ବାଚନ ଆୟୋଗରେ ୧୯୮୦ ବ୍ୟାଚର ହରିୟାଣା କ୍ୟାଡର ଆଇଏଏସ ଅଧିକାରୀ ଲାଭାସାଙ୍କ ଆଉ ଦୁଇବର୍ଷ କାର୍ଯ୍ୟକାଳ ଥିଲା ।

ମାନିଲା ସ୍ଥିତ ଏସୀୟ ବିକାଶ ବ୍ୟାଙ୍କ (ଏଡିବି) ପକ୍ଷରୁ ଗତ ଜୁଲାଇ ୧୫ରେ ଘୋଷଣା କରାଯାଇଥିଲା ଯେ ଅଶୋକ ଲାଭାସାଙ୍କୁ ବ୍ୟାଙ୍କର ଉପ-ସଭାପତି ଭାବେ ଚୟନ କରାଯାଇଛି । ସେ ଘରୋଇ କ୍ଷେତ୍ର ଓ ଘରୋଇ-ସରକାରୀ ସହଭାଗିତା କ୍ଷେତ୍ର ଦାୟିତ୍ୱରେ ରହିବେ । ଗତ ନିର୍ବାଚନ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଗୃହମନ୍ତ୍ରୀ ଅମିତ ଶାହାଙ୍କ ବିରୁଦ୍ଧରେ ଆଦର୍ଶ ଆଚରଣବିଧି ଉଲ୍ଲଙ୍ଘନ ଅଭିଯୋଗ ଉଠିବା ପରେ ଲାଭାସା ନିରପେକ୍ଷ ଆଭିମୁଖ୍ୟ ଗ୍ରହଣ କରି ଉଭୟଙ୍କ ବିରୋଧରେ ମତ ରଖିଥିଲେ ।