ଚମ୍ବଲ ନଦୀ ପାର ହେଉଥିବାବେଳେ ବୁଡିଗଲା ଡଙ୍ଗା: ୭ମୃତ, ୧୪ ନିଖୋଜ
ରାଜସ୍ଥାନ, ବୁନ୍ଦୀ ଜିଲ୍ଲାର ସୀମାରେ ଥିବା ଗୋଥାକାଲା ଗ୍ରାମ ନିକଟ ଚମ୍ବଲ ନଦୀରେ ଏକ ଡଙ୍ଗା ବୁଡ଼ିଯାଇଛି । ଏହି ଡଙ୍ଗାରେ ପ୍ରାୟ ୨୫ରୁ ୩୦ ଜଣ ଲୋକ ଥିଲେ । ଏମାନେ ଡଙ୍ଗାରେ କଲମେଶ୍ୱର ଧାମକୁ ଯାଉଥିଲେ । ଡଙ୍ଗାଟି ବୁଡିଯିବାରୁ ୧୦ରୁ୧୨ ଜଣ ଲୋକ ବୁଡିଯାଇଥିବାର ଜଣାପଡିଛି । ସେଥିମଧ୍ୟରୁ ୭ ମୃତ ଦେହ ଉଦ୍ଧାର କରାଯାଇଛି । ବୁଡିଯାଉଥିବା ଲୋକଙ୍କ ମଧ୍ୟରେ ଅଧିକାଂଶ ବୃଦ୍ଧ, ଶିଶୁ ଏବଂ ମହିଳା ଅଛନ୍ତି ଯାହାଙ୍କୁ ପହଁରିବା ଜଣାନାହିଁ । ପୋଲିସ୍ ସେଠାରେ ପହନ୍ଚି ତଦନ୍ତ ଆରମ୍ଭ କରି ୧୪ ଜଣ ନିଖୋଜଙ୍କ ତାଲିକା ପ୍ରସ୍ତୁତ କରିଛି । ଏସ୍ପି ଚୌଧୁରୀ କହିଛନ୍ତି ଯେ, ଡଙ୍ଗାରେ ଥିବା ଅନ୍ୟ ୧୫ ଜଣ ଲୋକଙ୍କୁ ନଦୀରୁ ସ୍ଥାନାନ୍ତର କରାଯାଇଛି । ନଦୀରେ ବୁଡିଯାଉଥିବା ମହିଳା ଓ ଶିଶୁଙ୍କୁ କୂଳକୁ ଆଣିବା ପାଇଁ କୌଣସି ସୁବିଧା ନଥିଲା । ଏଥିପାଇଁ ପ୍ରଶାସନ ଦାୟୀ ରହିଛି ବୋଲି ଅଭିଯୋଗ କରିଛନ୍ତି ଲୋକ । କାରଣ ଏହି ଉପାୟରେ ବେଆଇନ୍ ଭାବେ ଡଙ୍ଗା ଚାଲାଣ କରାଯାଉଛି କିନ୍ତୁ କୌଣସି ପ୍ରକାର ଦୁର୍ଘଟଣାକୁ ରୋକିବା ପାଇଁ କିଛି ଉପକରଣର ବ୍ୟବସ୍ଥା କରାଯାଇ ନାହିଁ ।