ପଞ୍ଜାବ(୨୪.୨.୨୩) :  ପଞ୍ଜାବରେ ଖଲିସ୍ତାନ ସମର୍ଥକଙ୍କ ଆତଙ୍କରାଜ । ହଜାର ହଜାର ଖଲିସ୍ତାନୀ ସମର୍ଥକ ହାତରେ ଖଣ୍ଡା, ବନ୍ଧୁକ ଧରି ବିକ୍ଷୋଭ ପଦର୍ଶନ କରିବା ସହ ଅଜନାଲ ଥାନାକୁ କବଜା କରିନେଇଥିଲେ । ‘ୱାରିସ୍ ପଞ୍ଜାବ ଦେ’ ସଂଗଠନର ମୁଖ୍ୟ ଅମୃତପାଲ୍ ସିଂହ ଓ ତାଙ୍କର ଶହ ଶହ ସମର୍ଥକ ଅମୃତସରର ଅଜନାଲା ପୁଲିସ ଷ୍ଟେସନରେ ହଙ୍ଗାମା କରିଥିଲେ । ହାତରେ ଖଣ୍ଡା ଧରି ଥାନା ଭିତରକୁ ଧସେଇ ପଶିବାକୁ ଉଦ୍ୟମ କରିଥିଲେ । ଅମୃତପାଲଙ୍କ ଜଣେ ସହଯୋଗୀ ଲବପ୍ରୀତ ସିଂହଙ୍କୁ ପୁଲିସ ଗିରଫ କରିଥିଲା । ଏହାକୁ ବିରୋଧ କରି ଥାନା ବାହାରେ ଜୋରଦାର ପ୍ରଦର୍ଶନ କରିଥିଲେ ଅମୃତପାଲଙ୍କ ସମର୍ଥକ । ଲବପ୍ରୀତ ସିଂହ ନିର୍ଦ୍ଦୋଷ, ତାଙ୍କ ନାଁରେ ମିଛ ଏଫଆଇଆର ଦିଆଯାଇଛି, ତେଣୁ ତାଙ୍କୁ ତୁରନ୍ତ ଖଲାସ କରିବାକୁ ଦାବି କରିଥିଲେ । ପୁଲିସ ପ୍ରତିରୋଧ କରିବାରୁ ପ୍ରବଳ ଉତେଜନା ସୃଷ୍ଟି ହୋଇଥିଲା । ଚାହୁଁ ଚାହୁଁ ଥାନା ପାଲଟି ଯାଇଥିଲା ରଣକ୍ଷେତ୍ର । ବିକ୍ଷୋଭକାରୀଙ୍କ ଆକ୍ରମଣରେ କିଛି ପୁଲିସ କର୍ମଚାରୀ ଗୁରୁତର ଆହତ ହୋଇଛନ୍ତି । ଅମୃତପାଲଙ୍କ ସମର୍ଥକଙ୍କ ଜୋରଦାର ହଙ୍ଗାମା ଯୋଗୁ ବ୍ୟାକଫୁଟକୁ ଚାଲି ଯାଇଥିଲା ପଞ୍ଜାବ ପୁଲିସ ।