ଭୁବନେଶ୍ୱର, ଓଡିଶା ସୀମାନ୍ତରେ ଥିବା କୋରାପୁଟ ଜିଲ୍ଲାର ପଟ୍ଟାଙ୍ଗୀ ବ୍ଲକ ଅନ୍ତର୍ଗତ କୋଟିଆ ପଞ୍ଚାୟତକୁ ନେଇ ଆନ୍ଧ୍ର ଓ ଓଡିଶା ମଧ୍ୟରେ ବିବାଦ ଚରମ ସୀମାରେ ପହଞ୍ଚିଛି । ଏପରିକି ଏହାର ସମାଧାନ ପାଇଁ ସୁପ୍ରିମ କୋର୍ଟର ଦ୍ୱାରସ୍ଥ ହୋଇଛି ଓଡିଶା । ମାତ୍ର ଏବେ ଏକ ରୋଚକ ଖବର ଶୁଣିବାକୁ ମିଳୁଛି । ଆନ୍ଧ୍ରର ସୀମାନ୍ତରେ ଥିବା କିଛି ଅଞ୍ଚଳର ଜନସାଧାରଣ ଓଡିଶାରେ ମିଶିବା ପାଇଁ ନିବେଦନ କରିଥିବା ଜଣାପଡିଛି । ତାଙ୍କର ମତ ହେଲା ଓଡିଶା ସରକାର ବିକାଶରଧାରା ପହଞ୍ଚାଇଥିବା ବେଳେ ଆନ୍ଧ୍ର ସରକାର କେବଳ କିଛି ପ୍ରୋତ୍ସାହନ ଦେଇ ଏହି ଅଞ୍ଚଳରେ ବସବାସ କରୁଥିବା ଜନସାଧାରଣଙ୍କ ମୌଳିକ ସୁବିଧାକୁ ଭୁଲିଯାଇଛନ୍ତି । କୋଟିଆ ବାସୀଙ୍କ ପାଇଁ ରାଜ୍ୟ ସରକାର ସ୍ୱତନ୍ତ୍ର ପ୍ୟାକେଜ ଘୋଷଣା କରିଥିବା ବେଳେ ଆନ୍ଧ୍ର କେବଳ ପ୍ରତିଶ୍ରୁତି ଦେଉଛି । ଆନ୍ଧ୍ର ପ୍ରଦେଶ ବଜୟନଗରମ ଜିଲ୍ଲା ଅନ୍ତର୍ଗତ ସାଲୁରମଣ୍ଡଳ ଅଧିନରେ ଥିବା କୋଡମା ପଞ୍ଚାୟତ ବାସିନ୍ଦା ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବାରୁ ସେମାନେ ଆନ୍ଧ୍ର ଛାଡି ଓଡିଶାରେ ମିଶିବାକୁ ନିବେଦନ କରିଛନ୍ତି । ଏଠାରେ ସୂଚନାଯୋଗ୍ୟଯେ, କୋଡମା ପଞ୍ଚାୟତ ବାସୀ କୋରାପୁଟର ପୂର୍ବତନ ସାଂସଦ ଜୟରାମ ପାଙ୍ଗୀ ବ୍ଲକ ଅଧ୍ୟକ୍ଷ ଜଗତଜ୍ୟୋତି ପାଙ୍ଗୀ ପ୍ରମୁଖଙ୍କୁ ନିମନ୍ତ୍ରଣ କରି ସେମାନେ ଓଡିଶାରେ ମିଶିବାକୁ ଇଚ୍ଛୁକ ଥିବା ପାଙ୍ଗୀଙ୍କୁ ଜଣାଇଛନ୍ତି ।