କୋଭିଡ଼ ହସ୍ପିଟାଲରେ ପଡ଼ିବ ତାଲା: ଆସନ୍ତା ୧ରୁ ଆଡ଼ମିସନ୍ ବନ୍ଦ
ଭୁବନେଶ୍ୱର, ରାଜ୍ୟରେ କରୋନା ସ୍କେଲ ଏବେ ତଳମୁହାଁ । ଧିରେଧିରେ କରୋନା ସଂକ୍ରମଣ କମିବାରେ ଲାଗିଛି । ସେପଟେ ମୃତ୍ୟୁ ସଂଖ୍ୟାରେ ବି ଯଥେଷ୍ଟ ପରିବର୍ତ୍ତନ ଦେଖା ଦେଇଛି । ଏହାରି ମଧ୍ୟରେ ରାଜ୍ୟ ସରକାର ଏକ ନିଷ୍ପତ୍ତି ନେଇଛନ୍ତି । ସରକାରଙ୍କ ଦ୍ୱାରା ପରିଚାଳିତ ୩୧ଟି ଘରୋଇ କୋଭିଡ଼ ହସ୍ପିଟାଲକୁ ବନ୍ଦ କରି ଦିଆଯାଇଛି । କେବଳ ସମ୍ ଓ ଆଦିତ୍ୟ ଅଶ୍ୱିନୀ ହସ୍ପିଟାଲକୁ ବାଦ ଦେଇ ଆଉ ଅନ୍ୟାନ୍ୟ ହସ୍ପିଟାଲରେ କରୋନା ରୋଗୀ ଆଡ଼ମିସନକୁ ମନା କରାଯାଇଛି । ଏନେଇ ସ୍ୱାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ ମହାପାତ୍ର ସମସ୍ତ ଜିଲ୍ଲାପାଳ ଓ ନଗର ନିଗମକୁ ଚିଠି ଲେଖିଛନ୍ତି । ସୂଚନା ମୂତାବକ, ଫେବୃଆରୀ ୧ତାରିଖ ପୂର୍ବରୁ ଉକ୍ତ ୩୧ଟି ହସ୍ପିଟାଲରେ ଯେଉଁ କରୋନା ରୋଗୀ ଚିକିତ୍ସିତ ହେଉଥିବେ, ସେମାନଙ୍କୁ ସମ୍ପୂର୍ଣ୍ଣ ସୁସ୍ଥ ହେବା ପର୍ଯ୍ୟନ୍ତ ସେଠାରେ ରଖାଯିବ । ରାଜ୍ୟରେ ସମୁଦାୟ ୪୮ଗୋଟି କୋଭିଡ଼ ହସ୍ପିଟାଲ ପ୍ରତିଷ୍ଠା କରାଯାଇଥିଲା, ତା ମଧ୍ୟରୁ ୩୧ଟି ଘରୋଇ ହସ୍ପିଟାଲକୁ ବନ୍ଦ କରିଦିଆଯିବ ।