ପୁରୀ: ଦୀର୍ଘ ୯ ମାସ ପରେ ଖୋଲିଛି ଶ୍ରୀମନ୍ଦିର । କୋଭିଡ କଟକଣା ଭିତରେ ଦିଅଁ ଦର୍ଶନର ପ୍ରଥମ ସୁଯୋଗ ମିଳିଛି ସେବାୟତ ଏବଂ ତାଙ୍କ ପରିବାରବର୍ଗଙ୍କୁ । ତେବେ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ପାଇଁ ନୂଆ ଏସଓପି ଜାରି କରାଯାଇଛି । ମନ୍ଦିର ଭିତରେ କେବଳ ଭକ୍ତମାନେ ଦର୍ଶନ କରି ପାରିବେ । ମନ୍ଦିର ଭିତରେ ଦୀପ ଜାଳିବା ଏବଂ ଶ୍ରୀମନ୍ଦିର ଭିତରକୁ ଭୋଗ, ଫୁଲ, ଦୀପ ନେବା ସଂପୂର୍ଣ୍ଣ ବାରଣ କରାଯାଇଛି । ମନ୍ଦିର ଭିତରେ ଥିବା କୌଣସି ପ୍ରତିମାକୁ ଛୁଇଁବାକୁ ମଧ୍ୟ ମନା କରାଯାଇଛି । ସେହିପରି ମନ୍ଦିର ପରିସରରେ ଓ ଆନନ୍ଦ ବଜାରରେ ମହାପ୍ରସାଦ ସେବନ ଉପରେ ମଧ୍ୟ ରୋକ ଲଗାଯାଇଛି ଏବଂ ମନ୍ଦିର ବାହାରେ ଓ ଭିତରେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି । ଅଣସେବାୟତଙ୍କୁ ରୋକିବା ପାଇଁ ଶ୍ରୀମନ୍ଦିର ଚାରିଦ୍ୱାରରେ ଜଗି ରହିଛନ୍ତି ପୋଲିସ।