ଗଞ୍ଜାମ ଜିଲ୍ଲାରେ ସ୍ୱାସ୍ଥ୍ୟ ସେବା ବିପର୍ଯ୍ୟସ୍ଥ

ଗଞ୍ଜାମ( କୃଷ୍ଣଚନ୍ଦ୍ର ପାଲ ), ଗଞ୍ଜାମ ଜିଲ୍ଲା ହେଉଛି ଓଡିଶାର ଏକ ବଡ ଜିଲ୍ଲା । ଗଞ୍ଜାମ ଜିଲ୍ଲାରେ ଲୋକଙ୍କ ସୁବିଧା ଦୃଷ୍ଟିରୁ ଅନେକ ସରକାରୀ ଡାକ୍ତରଖାନା ରହିଥିଲେ ମଧ୍ୟ ରୋଗୀମାନେ ବେସରକାରୀ ଚିକିତ୍ସାଳୟ ଯିବାକୁ ସୁରକ୍ଷିତ ମନେ କରିଥାନ୍ତି । ଏହାର କାରଣ ହେଉଛି ସରକାରୀ ଡାକ୍ତରଖାନାଗୁଡିକରେ ଡାକ୍ତର ଓ ଅନ୍ୟ କର୍ମଚାରୀ ପଦବୀଗୁଡିକ ଖାଲିପଡିରହିବା । ଯେଉଁ କାରଣରୁ ରୋଗୀମାନେ ଚିକିତ୍ସାପାଇଁ ସରକାରୀ ଡାକ୍ତରଖାନାକୁ ଯାଇପାରୁ ନାହାନ୍ତି । ଏହାସହ ସରକାର ନିମ୍ନମାନ ଔଷଧ ଯୋଗାଉଥିବାଏବଂ ଡାକ୍ତରମାନେ ଯେଉଁ ଔଷଧ ଲେଖୁଛନ୍ତି ତାହା ଶରୀରରେ କାମ କରୁନଥିବା ରୋଗୀମାନେ ଅଭିଯୋଗ କରୁଛନ୍ତି । ଏହି କାରଣରୁ ରୋଗୀମାନେ ବେସରକାରୀ ଚିକିତ୍ସାଳୟକୁ ଯିବାପାଇଁ ବାଧ୍ୟ ହେଉଛନ୍ତି । ସରକାରୀ ହସ୍ପିଟାଲର ଡାକ୍ତରମାନେ ବେସରକାରୀ ସ୍ତରରେ ଚିକିତ୍ସା କରି ପ୍ରଚୁର ପରିମାଣରେ ଅର୍ଥ ଉପାର୍ଜନ କରୁଥିବାରୁ ସେମାନେ ବେସରକାରୀ ଚିକିତ୍ସାଳୟରେ ବହୁ ସମୟ ଧରି ଚିକିତ୍ସା କରୁଥିବା ଜଣାପଡିଛି । ଏହି କାରଣରୁ ସରକାରୀ ଡାକ୍ତରଖାନାରେ ଧାର୍ଯ୍ୟ ସମୟରେ ଡାକ୍ତରମାନେ ଉପସ୍ଥିତ ରହପାରୁନାହାନ୍ତି । ଏହା ସହ ବେସରକାରୀ ଡାକ୍ତରାଖାନାଗୁଡିକରେ ଅଗ୍ନି ନିରାପତ୍ତା ପାଇଁ ପଦକ୍ଷେପ ନିଆଯାଉନାହିଁ । ଅଗ୍ନି ସୁରକ୍ଷା ବିଭାଗଠାରୁ ଅନୁମୋଦିତ ପ୍ରମାଣପତ୍ର ମାଲିକମାନେ ସଂଗ୍ରହ କରୁନାହାନ୍ତି । ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଉକ୍ତ ବେସରକାରୀ ହସ୍ପିଟାଲର ଲାଇସେନ୍ସ ରିନୁଏଲ ସାର୍ଟିଫିକେଟ ବେନିୟମଭାବେ ପ୍ରଦାନ କରୁଥିବା ଚର୍ଚ୍ଚା ହେଉଛି । ଏହି ବେସରକାରୀ ହସ୍ପିଟାଲର କୋଠାଗୁଡିକ ମଧ୍ୟ ବ୍ରହ୍ମପୁର ଉନ୍ନୟନ କର୍ତ୍ତୁପକ୍ଷଙ୍କ ଅନୁମୋଦନ ନଥାଇ ନିର୍ମାଣ ହେଉଥିବା ନଜରକୁ ଆସୁଛି । ତେବେ ଏନେଇ ଗଞ୍ଜାମ ଜିଳ୍ଲାପାଳ,ଆରକ୍ଷୀ ଅଧୀକ୍ଷକ, ଜିଲ୍ଲା ମୁଖ୍ୟ ଚିକିତ୍ସାଅଧିକାରୀଙ୍କୁ ନେଇ ଗୋଟିଏ ଟାକ୍ସଫୋର୍ସ ଗଠନ କରି ଘରୋଇ ଡାକ୍ତରଖାନାଗୁଡିକୁ ଯାଞ୍ଚ କରି ଓଡିଶା କ୍ଲିନିକାଲ ଏଷ୍ଟାବ୍ଲିସମେଣ୍ଟ କଣ୍ଟ୍ରୋଲ ଓ ରେଗୁଲେସନ ଅନୁସାରେ ଚାଲିବା ପାଇଁ ଜନସାଧାରଣରେ ଦାବି ହେଉଛି । ଏହି ନିୟମର ଉଲଘଂନ ହେଲେ ହସ୍ପିଟାଲର ମାଲିକଙ୍କ ବିରୋଧରେ ଅପରାଧିକ ମାମଲା ରୁଜୁ ପାଇଁ କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ ଜିଲ୍ଲା ପ୍ରଶାସନ ନିର୍ଦ୍ଦେଶ ଦେବାକୁ ମତ ପ୍ରକାଶ ପାଉଛି ।