ନୂଆଦିଲ୍ଲୀ: ସୋସିଆଲ ମିଡିଆରେ ନକଲି ଭିଡିଓ ଅପ୍ଲୋଡ କରାଯାଉଥିବା ଘଟଣାରେ କେନ୍ଦ୍ର ସରକାର ଘୋର ଉଦ୍ବେଗ ପ୍ରକାଶ କରିବା ସହ ଅଭିଯୁକ୍ତଙ୍କ ପାଇଁ ଦଣ୍ଡାଦେଶ ବ୍ୟବସ୍ଥା କରିଛନ୍ତି। ନିକଟରେ ବହୁ ଚର୍ଚ୍ଚିତ ଅଭିନେତ୍ରୀ ରଶ୍ମିକା ମନ୍ଦନା ଏବଂ କାଟ୍ରିନା କୈଫ ମଧ୍ୟ ଏହାର ଶିକାର ହୋଇଛନ୍ତି।
ତେବେ ଇଲେକ୍ଟ୍ରୋନିକ୍ସ ଏବଂ ଆଇଟି ମନ୍ତ୍ରଣାଳୟ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତି ଅନୁଯାୟୀ, ଏଆଇ ଟେକ୍ନୋଲୋଜିର ଅପବ୍ୟବହାର କରି ଧରାପଡୁଥିବା ବ୍ୟକ୍ତିଙ୍କୁ ୩ ବର୍ଷ ଜେଲଦଣ୍ଡ ମିଳିବା ସହ ତାଙ୍କ ଉପରେ ୧ ଲକ୍ଷ ଟଙ୍କା ଜୋରିମାନା ଲାଗୁ କରାଯିବ ବୋଲି ବିଜ୍ଞପ୍ତିରେ କୁହାଯାଇଛି। ମନ୍ତ୍ରଣାଳୟ ପକ୍ଷରୁ ସମସ୍ତ ସୋସିଆଲ ମିଡିଆ ପ୍ଲାଟଫର୍ମଗୁଡିକୁ ଏ ସମ୍ପର୍କରେ ସୂଚୀତ କରାଯାଇଛି। ଏଭଳି ଭିଡିଓର ସତ୍ୟାସତ୍ୟ ଯାଞ୍ଚ କରିବା ପରେ ସେଗୁଡିକୁ ଅପ୍ଲୋଡ କରିବାକୁ ମନ୍ତ୍ରଣାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଛି।
AI, Deepfake କ’ଣ ?
Deepfake ଶବ୍ଦ Deep Learningରୁ ନିଆଯାଇଛି। Deepfake ର ଅର୍ଥ ହେଉଛି ଏକାଧିକ ସ୍ତର। କୃତ୍ରିମ ସ୍ନାୟୁ ନେଟୱାର୍କ ଉପରେ ଡିପଫେକ ଟେକ୍ନୋଲୋଜି ଆଧାରିତ। ଏଥିରେ ଅନେକ ନକଲି ବିଷୟବସ୍ତୁ ପ୍ରକୃତ ବିଷୟବସ୍ତୁ ଭାବରେ ଦର୍ଶାଯାଇଥାଏ। ତେବେ ଏହି ଡିପଫେକ ନାମ ପ୍ରଥମେ 2017ରେ ଦେଖା ଦେଇଥିଲା। ଏହା ପରେ ଜଣେ ରେଡ୍ଡିଟ୍ ବ୍ୟବହାରକାରୀ ଏପରି ଅନେକ ଡିପଫେକ ଭିଡିଓ ତିଆରି କରିଥିଲେ।
ତେବେ ଦୁଇଟି ନେଟୱର୍କ ସାହାଯ୍ୟରେ ଏହି ଡିପଫେକ ଭିଡିଓ ପ୍ରସ୍ତୁତ ହୋଇଛି, ଯାହାର ଗୋଟିଏ ଅଂଶକୁ ଏନକୋଡର୍ କୁହାଯାଉଥିବାବେଳେ ଅନ୍ୟ ଅଂଶକୁ ଡିକୋଡର୍ କୁହାଯାଏ। ଏନକୋଡର୍ ମୂଳ ବିଷୟବସ୍ତୁକୁ ଭଲଭାବେ ପରଖିଥାଏ ଏବଂ ତା’ପରେ ନକଲି ଭିଡିଓ ସୃଷ୍ଟି କରିବାକୁ ଏହାକୁ ଡିକୋଡର୍ ନେଟୱାର୍କକୁ ସ୍ଥାନାନ୍ତର କରେ। ଏହା ପରେ, ଆପଣ ଏକ ଭିଡିଓ ପ୍ରସ୍ତୁତ କରନ୍ତି ଯେଉଁଥିରେ ଚେହେରା ବଦଳିଯାଏ କିନ୍ତୁ ଭିଡିଓ ଏବଂ ଫଟୋ ଅନ୍ୟ କାହାର ହୋଇଥାଏ।
