ଭୁବନେଶ୍ୱର -୧୪.୦୫.୨୦୨୧, ଆଜି ହେଉଛି ପବିତ୍ର ‘ଇଦ୍’ ପର୍ବ । ମୁସଲମାନ ସମ୍ପ୍ରଦାୟର ଲୋକମାନଙ୍କ ପାଇଁ ଏହା ଏକ ବଡ ପର୍ବ। ଇଦ୍’ ପର୍ବକୁ ବେଶ ଧୁମଧାମରେ ପାଳନ କରାଯାଇଥାଏ । କିନ୍ତୁ କରୋନା ମହାମାରୀ ଯୋଗୁ ଏହି ପର୍ଵ ଫିକା ପଡିଛି । କରୋନା ସଂକ୍ରମଣ ବ୍ୟାପକ ହେଉଥିବାରୁ ଦେଶରେ ବିଭିନ୍ନ ରାଜ୍ୟରେ ଲକଡାଉନ ଓ ସଟଡାଉନ ଜାରି ରହିଛି । କୋଭିଡ୍‌ କଟକଣା ଯୋଗୁଁ ନିରାଡମ୍ବର ଭାବେ ଦେଶବ୍ୟାପୀ ଏହି ପର୍ବ ପାଳିତ ହେଉଛି । ମାସସାରା ଉପବାସ ରଖି ରମଜାନ ମାସ ପାଳିତ ହେବା ପରେ ଗତକାଲି ଚାନ୍ଦ ଦେଖି ରୋଜା ଭାଙ୍ଗି ମୁସଲିମ୍ ସଂପ୍ରଦାୟର ଲୋକମାନେ ଆଜି ଇଦ୍-ଉଲ୍‌-ଫିତର ପାଳନ କରୁଛନ୍ତି।
ଏଠାରେ ସୂଚନାଯୋଗ୍ୟ ଯେ, ରାଜ୍ୟରେ ବର୍ତ୍ତମାନ ଲକଡାଉନ ଜାରି ରହିଛି । ଏନେଇ ଲୋକମାନେ ଘରେ ରହି ଇଦ ପର୍ବ ପାଳନ କରୁଛନ୍ତି । ତେବେ ମସଜିଦରେ ମଧ୍ୟ କରୋନା ପାଇଁ କଟକଣା ଲଗାଯାଇଛି । କରୋନା କଟକଣା ମଧ୍ୟରେ ମସଜିଦରେ ନମାଜ ପାଠ ହେଉଛି । ଇମାମଙ୍କ ସହ କେବଳ ୫ ଜଣ ନମାଜ ପାଠ କରିବାକୁ ଅନୁମତି ଦିଆଯାଇଥିଲା ।