ଭୁବନେଶ୍ୱର(ଏଏନଏସ)୦୫/୧୦, ରାବଣ ପୋଡି ପାଇଁ ଭୁବନେଶ୍ୱରରେ ବ୍ୟାପକ ଆୟୋଜନ କରାଯାଇଛି । ବର୍ଷା ସତ୍ୱେ ଧୁମଧାମରେ ରାବଣ ପୋଡ଼ି କରିବାକୁ ବିଭିନ୍ନ ପୂଜା କମିଟି ସଦସ୍ୟ ପ୍ରସ୍ତୁତି କରିଛନ୍ତି । ଭୁବନେଶ୍ଵରର ୪ ଟି ପ୍ରମୁଖ ପୂଜାମଣ୍ଡପରେ ହେଉଛି ରାବଣ ପୋଡି । ପ୍ରାୟ ୫୦ ଫୁଟ୍ର ରାବଣ ମୂର୍ତ୍ତି ତିଆରି କରିଛି ବୋଲି ଝାରପଡ଼ା ପୂଜା କମିଟି । ସେହିଭଳି ବରମୁଣ୍ଡା ପୂଜାମଣ୍ଡପ ମଧ୍ୟ ରାବଣ ପୋଡି ପାଇଁ ସମସ୍ତ ପ୍ରକାର ପ୍ରସ୍ତୁତି ସାରିଛି । ବରମୁଣ୍ଡା ପୂଜା କମିଟି ୮୦ ମିଟର ଉଚ୍ଚତାର ରାବଣ ତିଆରି କରିଛି । କମିଶନରେଟ ପୋଲିସର ଗାଇଡଲାଇନ ମାନି ରାବଣ ପୋଡ଼ି ହେବ । ଡାକବଙ୍ଗଳା ଛକ ପଣସ କୋଟାର ଏକ ପରିବାର ଦୀର୍ଘ ୩୦ ବର୍ଷ ଧରି ତିଆରି କରି ଆସୁଛନ୍ତି ରାବଣ । ନିଜ ପରିବାର ସହ ମିଶି ମହିଳା ଚିତ୍ରଶିଳ୍ପୀ ଶୋଭା ରାଣୀ ଏହି ରାବଣ ତିଆରି କରନ୍ତି । ମୋଟ ୧୭୮ ପୂଜା ମଣ୍ଡପରେ ମା’ ଦୁର୍ଗତିନାଶିନୀ ପୂଜା ପାଉଛନ୍ତି। ଏଥିପାଇଁ ପୂରା ସହର ଉତ୍ସବମୁଖର ହୋଇଉଠିଛି। ଭଳିକି ଭଳି ତୋରଣ ସାଙ୍ଗକୁ ଆଖିଝଲସା ଆଲୋକମାଳା ଭକ୍ତଙ୍କୁ ଆକୃଷ୍ଟ କରୁଛି।
