ଲକ୍ଷ୍ନୌ (୬.୧୦.୨୨) : ଦକ୍ଷିଣ ଆଫ୍ରିକା ପ୍ରଥମ ଦିନିକିଆରେ ଟସ୍ ଜିତିଛନ୍ତି ଭାରତର କାମଚଳା ଅଧିନାୟକ ଶିଖର ଧୱନ । ସେ ଟସ୍ ଜିତିବା ପରେ ଦକ୍ଷିଣ ଆଫ୍ରିକାକୁ ପ୍ରଥମେ ବ୍ୟାଟିଙ୍ଗ କରିବାକୁ ନିମନ୍ତ୍ରଣ କରିଛନ୍ତି । ଉତ୍ତର ପ୍ରଦେଶର ଲକ୍ଷ୍ନୌରେ ଖେଳା ଯାଉଥିବା ଏହି ମ୍ୟାଚ୍ ବର୍ଷା ଯୋଗୁ ବିଳମ୍ବରେ ଆରମ୍ଭ ହୋଇଛି। ଏଥିପାଇଁ ମ୍ୟାଚ୍କୁ ୪୦ ଓଭର ବିଶିଷ୍ଟ କରାଯାଇଛି। ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜକୁ ଭାରତ ୨-୧ରେ ଜିତିଥିଲା। ହେଲେ ଟି-୨୦ ବିଶ୍ୱକପ ସ୍କ୍ୱାଡରେ ସାମିଲ ଥିବା କୌଣସି ଖେଳାଳି ଆଜିର ମ୍ୟାଚ୍ ଖେଳୁ ନାହାନ୍ତି। ଏଥିପାଇଁ ଧୱନଙ୍କୁ ଅଧିନାୟକ ଓ ଶ୍ରେୟସ ଆୟରଙ୍କୁ ଉପ ଅଧିନାୟକ କରାଯାଇଛି। ଭାରତ ପାଇଁ ଆଜି ଦିନିକିଆରେ ଋତୁରାଜ ଗାଏକ୍ୱାଡ ଓ ଲେଗ ସ୍ପିନର ରବି ବିଷ୍ଣୋଇ ଡେବ୍ୟୁ କରିଛନ୍ତି।
