ଭୁବନେଶ୍ୱର(ଏଏନଏସ)୨୨.୦୧.୨୦୨୨, ଓଡ଼ିଶାରେ ପଞ୍ଚାୟତ ନିର୍ବାଚନ ପାଇଁ ପ୍ରସ୍ତୁତି ଜୋରଦାର ଚାଲିଛି । ଗତକାଲିଠାରୁ ସରିଯାଇଛି ନାମାଙ୍କନ ଦାଖଲ ପ୍ରକ୍ରିୟା । ସୋମବାରଠୁ ଆରମ୍ଭ ହୋଇଥିବା ଏହି ପ୍ରକ୍ରିୟା ଶୁକ୍ରବାର ଶେଷ ହୋଇଛି। ମୋଟ ୨ଲକ୍ଷ ୨୮ହଜାର ୦୭୯ଜଣ ପ୍ରାର୍ଥୀ ବିଭିନ୍ନ ପଦବୀ ପାଇଁ ନିଜର ନାମାଙ୍କନ ପତ୍ର ଦାଖଲ କରିଛନ୍ତି । ସେହିଭଳି ଶେଷଦିନରେ ମୋଟ ୯୪,୬୦୫ଜଣ ପ୍ରାର୍ଥିପତ୍ର ଦାଖଲ କରିଛନ୍ତି। ଶେଷ ଦିନରେ ଜିଲ୍ଲା ପରିଷଦ ସଭ୍ୟ ପାଇଁ ୨୧୯୧, ସମିତିସଭ୍ୟ ପାଇଁ ୧୨,୫୧୨ ଜଣ, ସରପଞ୍ଚ ପାଇଁ ୧୪,୦୭୪ଜଣ ଏବଂ ୱାର୍ଡମେମ୍ବର ପାଇଁ ୬୫,୮୨୮ଜଣ ପ୍ରାର୍ଥିପତ୍ର ଦାଖଲ କରିଛନ୍ତି । ଏହାକୁ ମିଶାଇ ଜିଲ୍ଲା ପରିଷଦ ସଭ୍ୟ ପାଇଁ ୩୯୯୯ଜଣ ପ୍ରାର୍ଥିପତ୍ର ଦାଖଲ କରିଥିବାବେଳେ ସରପଞ୍ଚ ପାଇଁ ୩୪,୬୧୩ଜଣ, ସମିତିସଭ୍ୟ ପାଇଁ ୨୮,୧୫୩ ଏବଂ ୱାର୍ଡମେମ୍ବର ୧ ଲକ୍ଷ ୬୨ ହଜାର ୨୯୭ ପ୍ରାର୍ଥିପତ୍ର ଦାଖଲ କରିଥିବା ରାଜ୍ୟ ନିର୍ବାଚନ କମିଶନରଙ୍କ କାର୍ଯ୍ୟାଳୟରୁ ଜଣାପଡ଼ିଛି।
ନାମାନଙ୍କ ପତ୍ର ଦାଖଲ ଶେଷ ହୋଇଥିବାବେଳେ ଆଜି ନାମାଙ୍କନ ପତ୍ର ଯାଂଚ ହେବ । ୨୫ ତାରିଖ ଅପରାହ୍ନ ୩ଟା ପର୍ଯ୍ୟନ୍ତ ନାମାଙ୍କନ ପତ୍ର ପ୍ରତ୍ୟାହାର କରିହେବ । ୨୫ତାରିଖ ସନ୍ଧ୍ୟାରେ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବା ସହ ପ୍ରାର୍ଥୀଙ୍କୁ ମିଳିଯିବ ନିର୍ବାଚନୀ ଚିହ୍ନ । ଚିହ୍ନ ମିିଳିବା ପରେ ଆରମ୍ଭ ହେବ ଅସଲ ଲଢ଼େଇ ।
ନିର୍ବାଚନ ନେଇ ଏବେ ଗଳିକନ୍ଦିରେ ଆରମ୍ଭ ହୋଇଯାଇଛି ମୂଲଚାଲ । ବିଭିନ୍ନ ଜୋନ୍ ଓ ପଞ୍ଚାୟତରେ ବିଦ୍ରୋହୀ ପ୍ରାର୍ଥୀଙ୍କୁ ନିର୍ବାଚନ ଦୌଡ଼ରୁ ଓହରିଯିବା ପାଇଁ ବୁଝାଇବାକୁ ବିଭିନ୍ନ ଗୋଷ୍ଠୀ ଲାଗି ପଡ଼ିଛନ୍ତି ।
ସୂଚନାଯୋଗ୍ୟ ଯେ, ଚଳିତଥର ତ୍ରିସ୍ତରୀୟ ପଞ୍ଚାୟତ ଭୋଟରେ ୨ କୋଟି ୭୯ଲକ୍ଷ ୩୫ହଜାର ୫୨୦ ମତଦାତା ମତାଧିକାର ସାବ୍ୟସ୍ତ କରିବେ । ୯୧ ହଜାର ୯୧୩ ୱାର୍ଡ ମେମ୍ବର ପଦବୀ, ୬୭୯୪ ସରପଞ୍ଚ, ୬୭୯୩ ପଞ୍ଚାୟତ ସମିତିସଭ୍ୟ ଓ ୮୫୩ ଜିଲ୍ଲା ପରିଷଦ ସଭ୍ୟ ପାଇଁ ଭୋଟ ହେବ । ରାଜ୍ୟରେ କରୋନା ସଂକ୍ରମଣ ବୃଦ୍ଧି ପାଉଥିବାରୁ କଟକଣା ମଧ୍ୟରେ ନିର୍ବାଚନ ଓ ପ୍ରଚାର ଅନୁଷ୍ଠିତ ହେବ । ଏଥର ନିର୍ବାଚନରେ ସଭା, ସମାବେଶ, ଶୋଭାଯାତ୍ରା, ସାଇକେଲ ଓ ବାଇକ୍ ରାଲିକୁ ବାରଣ କରାଯାଇଛି । ରାଜନୈତିକ ଦଳ କିମ୍ୱା ପ୍ରାର୍ଥୀଙ୍କ ସମାବେଶ ମଧ୍ୟ ମନା ହୋଇଛି ।
![You are currently viewing ପଞ୍ଚାୟତ ନିର୍ବାଚନ ପାଇଁ ସରିଲା ନାମାଙ୍କନ ଦାଖଲ ପ୍ରକ୍ରିୟା, ୨୫ରେ ପ୍ରକାଶ ପାଇବ ଚୂଡ଼ାନ୍ତ ପ୍ରାର୍ଥୀ ତାଲିକା](https://ansodia.in/wp-content/uploads/2022/01/odisha-1-163620681016x9-1.jpg)