ଯାଜପୁର (ଏଏନଏସ) ୨୦/୧୨: ଯାଜପୁର ଜିଲ୍ଲା ଧର୍ମଶାଳା ତହସିଲ ପରିସରରେ ମହିଳାଙ୍କ ଆତ୍ମହୁତି ଉଦ୍ୟମ । ଜମିଜମା ସମସ୍ୟାର ସମାଧାନ ନହେବାରୁ ଆଜି ତହସିଲ ଅଫିସ ସମ୍ମୁଖରେ ଦେହରେ ପେଟ୍ରୋଲ ଢାଳି ନିଆଁ ଲଗାଇବାକୁ ଉଦ୍ୟମ କରିଥିଲେ ଜଣେ ମହିଳା । ଉକ୍ତ ମହିଳା ଜଣଙ୍କ ହେଉଛନ୍ତି ଯାଜପୁର ଜିଲ୍ଲା ଧର୍ମଶାଳା ଥାନା ଅନ୍ତର୍ଗତ ନେଉଳପୁରର ଅକ୍ଷୟ ରାଉତଙ୍କ ସ୍ତ୍ରୀ ଅନିମା ରାଉତ ।
ସୂଚନା ଅନୂସାରେ ଉକ୍ତ ମହିଳା ଜଣଙ୍କ ଚକ ଜମି ବିକ୍ରି କରିବାରେ ସମସ୍ୟା ଦେଖାଦେଉଥିବା ବେଳେ ବାରମ୍ବାର କୋର୍ଟ ଓ ତହସିଲ ଅଫିସକୁ ଦୌଡି ଦୌଡି ସମସ୍ୟାର ସମାଧାନ ହୋଇପାରୁନଥିବାରୁ ଏଭଳି ଚରମ ନିଷ୍ପତି ଗ୍ରହଣ କରିଥିଲେ ମହିଳା ଜଣଙ୍କ । ତେବେ ଦେହରେ ପେଟ୍ରୋଲ ଢାଳି ନିଆଁ ଲଗାଇବା ସମୟରେ ପୋଲିସ୍ କାବୁ କରିଛି । ଅନ୍ୟପଟେ ଏହି ମାମଲାକୁ ନେଇ ତଦସିଲଦାରଙ୍କ କୌଣସି ପ୍ରତିକ୍ରିୟା ହସ୍ତଗତ ହୋଇପାରିନି ।