ଦେବଗଡ଼ ଜିଲ୍ଲା ଟିପିରିସିଙ୍ଗାରେ ପିଢ଼ି ପରେ ପିଢ଼ି ମାନି ଆସୁଛନ୍ତି ଠାକୁରାଣୀଙ୍କ ନିର୍ଦ୍ଦେଶ । ଖଟ ବ୍ୟବହାର ନକରି ତଳେ ପଟିଆରେ ଶୋଇଥାନ୍ତି ସଭିଏଁ । ଆସ୍ଥା ଓ ପରମ୍ପରା ନାଁରେ ଆଜି ବି ଅନ୍ଧବିଶ୍ୱାସର ବଶବର୍ତ୍ତୀ ପୂରା ଗାଁ । ଜଣେ କି ଦୁଇ ଜଣ ନୁହେଁ, ଅନ୍ଧ ବିଶ୍ୱାସରେ କବଳିତ ପୂରା ଗାଁ। ଦେଢ଼ଶହରୁ ଅଧିକ ଆଦିବାସୀ ପରିବାରଙ୍କୁ ନେଇ ରହିଥିବା ଦେବଗଡ଼ ଜିଲ୍ଲା ଟିପିରସିଙ୍ଗା ଗାଁରେ ଆଜି ମଧ୍ୟ ଲୋକକଥା ଓ କିମ୍ବଦନ୍ତୀକୁ ନେଇ ଲୋକଙ୍କ ମନରେ ରହିଛି ଅଜଣା ଭୟ। ଗ୍ରାମ ଦେବତୀ ମା ବରହେନଙ୍କ ଆଦେଶ ଯୋଗୁଁ ଖଟ ଆଜି ବି ବର୍ଜିତ ରହିଛି । ଘରେ ଖଟରେ ଶୋଇଲେ ଖଟ ଓଲଟି ପଡିଥାଏ ଏବଂ ଘରେ ସାପ ବିଛା ଭଳି ଶରୀସୃପଙ୍କ ଆଗମନ ହୋଇଥାଏ । ଗାଁରେ କେହି ଘରେ ଖଟ ତିଆରି ପାଇଁ ଚେଷ୍ଟା କଲେ, ଠାକୁରାଣୀଙ୍କ କାଲୋ ବା ପୂଜକଙ୍କୁ ସ୍ୱପ୍ନାଦେଶ ହୋଇଥାଏ।
![](https://ansodia.in/wp-content/uploads/2022/12/WhatsApp-Image-2022-12-27-at-8.22.54-PM.jpeg)
ଗ୍ରାମବାସୀଙ୍କ କହିବା ଅନୁଯାୟୀ ଗାଁ ଠାକୁରାଣୀଙ୍କ ଆଦେଶକୁ ସମ୍ମାନ ଜଣାଇ ସମସ୍ତ ପରିବାର ନିଜ ନିଜ ଘରେ ଖଟ ବଦଳରେ ଖଜୁରୀ ପତ୍ରରେ ତିଆରି ପଟିଆକୁ ବ୍ୟବହାର କରିଥାନ୍ତି । ଟିପିରସିଙ୍ଗା ଗାଁର ସତ୍ୟତା ପରଖିବାକୁ ଏକ ସମୟରେ ଖୋଦ ରାଜା ଆସି ଅନ୍ୟ ଏକ ଗାଁରୁ ଖଟଆଣି ପରୀକ୍ଷା କରିବାରୁ ଖଟ ଓଲଟି ପଡ଼ିଥିଲା । ପରେ ରାଜା ମା ବରହେନଙ୍କ ଶକ୍ତି ଆଗରେ ନତମସ୍ତକ ହୋଇଥିଲେ । ଆଦିବାସୀ ଅଧ୍ୟୁଷିତ ତିଲେଇବଣି ବ୍ଲକର ବିଭିନ୍ନ ଗାଁରେ ଆଜି ମଧ୍ୟ ଗ୍ରାମବାସୀ ଅନ୍ଧବିଶ୍ୱାସର ବଶବର୍ତ୍ତୀ ହୋଇ ରହିଛନ୍ତି । ଲୋକକଥା ଓ କିମ୍ବଦନ୍ତୀ ଶୁଣିଶୁଣି ଗାଁର ନୂତନ ପିଢ଼ି ମଧ୍ୟ ବିଜ୍ଞାନ ଯୁଗରେ ଆଧୁନିକତା ଠାରୁ ନିଜକୁ ଦୂରେଇ ରଖୁଥିବା ଦେଖିବାକୁ ମିଳୁଛି।