ଭୁବନେଶ୍ୱର, ନୟାଗଡ଼ର ପରୀ ଘଟଣା ହେଉ କିମ୍ବା ଆଠଗଡ଼ର ଚାଷୀ ଋଣକୁ ନେଇ ବିଧାନସଭା ସମ୍ମୁଖରେ ଆତ୍ମହତ୍ୟା ଉଦ୍ୟମ ଲୋକ ଲୋଚନରୁ ହଟି ନଥିବାବେଳେ, ଆଜି ପୁଣି ଏକ ଅଭାବନୀୟ ଘଟଣା ଘଟିଛି ବିଧାନସଭା ନିକଟରେ । ବିଧାନସଭା ପଛପଟ ଗେଟ୍ ନିକଟରେ ଆତ୍ମହତ୍ୟା ଉଦ୍ୟମ କରୁଥିବା କୁଜଙ୍ଗ ଅଞ୍ଚଳର ମା’ ଓ ପୁଅଙ୍କୁ ନିଜ ହେପାଜତକୁ ନେଇଛି ପୋଲିସ । ପୁଅ ହତ୍ୟା ମାମଲାରେ ନ୍ୟାୟ ନମିଳିବାରୁ ସୁଲଚନା ଦାଶ ଓ ପୁଅ ସୁବ୍ରତ ଦାଶ ଏହି ଆତ୍ମହତ୍ୟା ଉଦ୍ୟମ କରୁଥିବାର ଜଣାପଡ଼ିଛି । ସୁଲଚନାଙ୍କ କହିବା ମୂତାବକ, ବର୍ଷେ ତଳେ ପୁଅ ଅମୃତ ଦାଶଙ୍କୁ ହତ୍ୟା କରାଯାଇଥିବାବେଳେ, ତାଙ୍କୁ ନ୍ୟାୟ ମିଳିଲା ନାହିଁ । ଏଠି ପ୍ରଶ୍ନଉଠେ ବାରମ୍ବାର ବିଧାନସଭା ସମ୍ମୁଖରେ ଏଭଳି ଘଟୁଥିବାବେଳେ, ସେଠାରେ ନିୟୋଜିତ ଥିବା ସୁରକ୍ଷା ବଳୟ ଓ ଗୁଇନ୍ଦା ବିଭାଗ କିଭଳି ଏହାର ଟେର ପାଉନାହାଁନ୍ତି ।