ସୁସ୍ଥ ଶରୀର ଏବଂ ଅନେକ ରୋଗ ସହିତ ଲଢ଼ିବା ପାଇଁ ଶରୀର ଅନେକ ପ୍ରକାରର ପୋଷକ ତତ୍ତ୍ୱ ଆବଶ୍ୟକ କରିଥାଏ। ସେଥିପାଇଁ ଖାଦ୍ୟପେୟ ପ୍ରତି ଧ୍ୟାନ ଦେବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏନେଇ ଭାଇରାଲ୍ ଫ୍ଲୁ, ଥଣ୍ଡା ଏବଂ କାଶରୁ ନିଜକୁ ରକ୍ଷା କରିବା ପାଇଁ, ପ୍ରଚୁର ସବୁଜ ପନିପରିବା, ଫଳ ଏବଂ ଜୁସ୍ ପିଇବା ଉଚିତ୍। ସେହିଭଳି ଶୀତ ଋତୁରେ ଗାଜର ଖାଇବା ସ୍ୱାସ୍ଥ୍ୟ ପାଇଁ ମଧ୍ୟ ବହୁତ ଲାଭଦାୟକ ହୋଇଥାଏ। କାରଣ ଗାଜରରେ ଅନେକ ପୋଷକ ତତ୍ତ୍ୱ ରହିଥାଏ, ଯେପରିକି ଫାଇବର, ଆଇରନ୍, ପ୍ରୋଟିନ୍ ଏ, ସି, ଡି ରହିଥାଏ, ଯାହା ଆମ ଶରୀରକୁ ସୁସ୍ଥ ରଖିବାରେ ସାହାଯ୍ୟ କରିଥାଏ। ତେବେ ଆସନ୍ତୁ ଜାଣିବା ଗାଜର ଖାଇବାର ଉପକାରିତା ବିଷୟରେ ….
ଗାଜରରେ ଭିଟାମିନ୍ ଇ ଥାଏ ଯାହା ରକ୍ତଚାପ ନିୟନ୍ତ୍ରଣ କରିଥାଏ। ଏହାକୁ ଖାଦ୍ୟରେ ସାମିଲ କରିବା ଦ୍ୱାରା ରକ୍ତଚାପ ନିୟନ୍ତ୍ରଣରେ ରହିଥାଏ।
ଗାଜର ଖାଇବା ମଧ୍ୟ ହୃଦଜନିତ ସମସ୍ୟା ପାଇଁ ଅତ୍ୟନ୍ତ ଲାଭଦାୟକ ଅଟେ। ଏହାକୁ ନିୟମିତ ଖାଇବା ଦ୍ୱାରା ହୃଦ୍ରୋଗର ଆଶଙ୍କା କମ ହୋଇଥାଏ। ଏଥିରେ ଥିବା ଆଣ୍ଟିଅକ୍ସିଡାଣ୍ଟ କୋଲେଷ୍ଟ୍ରଲ ସ୍ତରକୁ ହ୍ରାସ କରିଥାଏ, ଯାହା ଫଳରେ ହୃଦଘାତର ଆଶଙ୍କା ହ୍ରାସ ପାଇଥାଏ।
ଗାଜରରେ ଭିଟାମିନ୍ ଏ ଏବଂ ବିଟା କାରୋଟିନ୍ ମିଳିଥାଏ ଯାହା ଦୃଷ୍ଟିଶକ୍ତି ବୃଦ୍ଧି କରିବାରେ ସହାୟକ ହୋଇଥାଏ। ଦୃଷ୍ଟିଶକ୍ତି ଭଲ ରଖିବା ପାଇଁ ଗାଜର ରସ ପିଇବା ଅତ୍ୟନ୍ତ ଲାଭଦାୟକ ହୋଇଥାଏ ।
ସେହିଭଳି ନିୟମିତ ଖାଦ୍ୟରେ ଗାଜର ଖାଇବା ଦ୍ୱାରା ରୋଗ ପ୍ରତିରୋଧକ ଶକ୍ତି ମଜବୁତ ହୋଇଥାଏ। ଗାଜର କିମ୍ବା ଗାଜର ରସ ପିଇବା ଦ୍ୱାରା ଶରୀରରେ ରୋଗ ପ୍ରତିରୋଧକ ଶକ୍ତି ବଢ଼ିଥାଏ, ଯାହା ଶରୀରକୁ ସଂକ୍ରମଣ ଜନିତ ରୋଗ ସହ ଲଢ଼ିବାରେ ସାହାଯ୍ୟ କରିଥାଏ।
ଏସବୁ ବ୍ୟତୀତ ଅତ୍ୟଧିକ ଓଜନକୁ ନିୟନ୍ତ୍ରଣରେ ରଖିବାକୁ ଚାହୁଁଥିଲେ ଗାଜର ରସ ପିଅନ୍ତୁ। ଗାଜର ରସରେ କ୍ୟାଲୋରୀ ପରିମାଣ ବହୁତ କମ୍ ରହିଥାଏ, ଯାହା ଓଜନ ହ୍ରାସ କରିବାରେ ଲାଭଦାୟକ ଅଟେ। ଏହାକୁ ପିଇବା ପରେ ଦୀର୍ଘ ସମୟ ପର୍ଯ୍ୟନ୍ତ ପେଟ ପୂର୍ଣ୍ଣ ଅନୁଭବ ହୋଇଥାଏ। ଯାହାଫଳରେ ଅତ୍ୟଧିକ ଭୋକ ଲାଗିବା ସମସ୍ୟା ଦୂର ହୋଇଥାଏ।
