ନୂଆଦିଲ୍ଲୀ-୦୯.୦୧.୨୦୨୨, ଆସୁଛି ବିଧାନସଭା ନିର୍ବାଚନ । ପାଞ୍ଚଟି ରାଜ୍ୟ ଉତ୍ତରପ୍ରଦେଶ, ଉତ୍ତରାଖଣ୍ଡ, ମଣିପୁର, ଗୋଆ ଏବଂ ପଞ୍ଜାବରେ ହେବାକୁ ଥିବା ବିଧାନସଭା ନିର୍ବାଚନର ତାରିଖ ନିର୍ବାଚନ ଆୟୋଗ ଘୋଷଣା କରିଛନ୍ତି । ତେବେ ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବଢ଼ିବାରେ ଲାଗିଛି । ଅନେକ ଲୋକ କ୍ବାରେଣ୍ଟାଇନ୍ ରେ ରହିଥିବାବେଳେ ବିଧାନସଭା ନିର୍ବାଚନରେ ଭୋଟ୍ କିଭଳି ଦେବେ ଏହାକୁ ନେଇ ସମସ୍ୟା ଦେଖାଦେଇଛି । ତେବେ ସଂକ୍ରମିତ ଲୋକଙ୍କ ପାଇଁ ପୋଷ୍ଟାଲ ବାଲାଟ୍ର ସୁବିଧା ଉପଲବ୍ଧ ହେବ । ଏଥିପାଇଁ ଯତ୍ନର ସହ ପ୍ରସ୍ତୁତ କରାଯାଇଛି । ନିର୍ବାଚନ ଆୟୋଗ ଦଳ କରୋନା ସଂକ୍ରମିତ କିମ୍ବା ସନ୍ଦିଗ୍ଧଙ୍କ ଘରକୁ ଯାଇ ସେମାନଙ୍କ ଠାରୁ ସେଠାରେ ଭୋଟ୍ ଗ୍ରହଣ କରିବେ । ତେବେ ଏହି ସମଗ୍ର ପ୍ରକ୍ରିୟାର ଭିଡିଓଗ୍ରାଫି ମଧ୍ୟ କରାଯିବ । ଏହିପରି ଭୋଟରମାନେ ଇଲେକ୍ଟ୍ରୋନିକ୍ କିମ୍ବା ହାତରେ ନିର୍ବାଚନ ଅଧିକାରୀଙ୍କୁ ପୋଷ୍ଟ ମାଧ୍ୟମରେ ନିଜର ବାଲାଟ୍ ପେପର ଦେବାରେ ସକ୍ଷମ ହେବେ । ଏହି ସୁବିଧା କରୋନା ପ୍ରଭାବିତ ଲୋକଙ୍କୁ ତଥା ୮୦ ବର୍ଷରୁ ଅଧିକ ବୟସ୍କ ତଥା ଭିନ୍ନକ୍ଷମଙ୍କୁ ପ୍ରଦାନ କରାଯାଇଛି ।
