ଆଖିବୁଜିଲେ ପାଣ୍ଡିଆ
ପୁରୀ(ଅନନ୍ତ ସିଂ), ଡେଲାଙ୍ଗ ବ୍ଲକର ଜେନାପୁର ଗ୍ରାମ ପଞ୍ଚାୟତର ଦେପୁର ପାଣିସାହିରେ ନିର୍ବାଚନୀ ହିଂସାକାଣ୍ଡ ହୋଇଥିଲା । ଏଥିରେ ଆହତ ପାଣ୍ଡିଆ ବେହେରାଙ୍କର ବୁଧବାର ମୃତ୍ୟୁ ହୋଇଛି । ପାଣ୍ଡିଆଙ୍କ ସ୍ତ୍ରୀ ବନିତା ବେହେରାଙ୍କ ଅଭିଯୋଗ ଅନୁଯାୟୀ ଦେପୁର ବ୍ରାହ୍ମଣ ସାହିର ରମେଶ ଚନ୍ଦ୍ର ଷଡ଼ଙ୍ଗୀ (ପେଜୁଆ), ଉମେଶ ଚନ୍ଦ୍ର ଷଡ଼ଙ୍ଗୀ (ଅର୍ମି) ଓ ସତ୍ୟନାରାୟଣ ଷଡ଼ଙ୍ଗୀ ପାଣ୍ଡିଆଙ୍କୁ ୫ହଜାର ଟଙ୍କା ଦେଇଥିଲେ । ଗ୍ରାମରେ ଏ ଟଙ୍କା ବାଣ୍ଟି ବିଜେପିକୁ ଭୋଟ ଦେବା ପାଇଁ କହିଥିଲେ । ଗ୍ରାମରେ କେହି ରାଜି ନହେବାରୁ ପାଣ୍ଡିଆ ସେମାନଙ୍କୁ ୪ହଜାର ଟଙ୍କା ଫେରାଇଥିଲେ । ମାତ୍ର ଏଥିରେ ଉତ୍କ୍ଷିପ୍ତ ହୋଇ ସେମାନେ ପାଣ୍ଡିଆଙ୍କୁ ମାଡ ମାରିବାରୁ ସେ ଗୁରୁତର ଆହତ ହୋଇଥିଲେ । ପରଦିନ ତାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଭୁବନେଶ୍ୱରସ୍ଥିତ କ୍ୟାପିଟାଲ ହସ୍ପିଟାଲକୁ ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପରିବାର ଲୋକମାନେ ଏ ସମ୍ପର୍କରେ ଡେଲାଙ୍ଗ ଥାନାରେ ଅଭିଯୋଗ କରିବା ସହ ଅଭିଯୁକ୍ତ ପରିବାରଙ୍କ ଘର ଆଗରେ ଶବ ରଖି କ୍ଷତିପୂରଣ ଓ ଅଭିଯୁକ୍ତଙ୍କୁ ତୁରନ୍ତ ଗରିଫ କରିବା ଦାବିରେ ଶବ ରଖି ଧାରଣରେ ବସିଥିଲେ ।
ଖବର ପାଇ ଡେଲାଙ୍ଗ ବିଡିଓ ଦିଲୀପ କୁମାର ଷଡଙ୍ଗୀ ୧୦ ହଜାର ଟଙ୍କା ଆର୍ଥିକସହାୟତା ଯୋଗାଇ ଦେଇଥିଲେ । ତିନିଜଣ ଅଭିଯୁକ୍ତଙ୍କ ମଧ୍ୟରୁ ଡେଲାଙ୍ଗ ପୁଲିସ ଦୁଇ ଜଣଙ୍କୁ ଗିରଫ କରିଥିବାବେଳେ ମୁଖ୍ୟ ଅଭିଯୁକ୍ତକୁ ତୁରନ୍ତ ଗିରଫ କରାଯିବ ବୋଲି ପିପିଲି ଏସ୍ଡିପିଓ ଦେବଦତ୍ତ ବରାଳ ପ୍ରତିଶ୍ରୁତି ଦେବା ପରେ ପରିବାର ଲୋକେ ଶବ ସତ୍କାର କରିବା ସହ ଧାରଣରୁ ଉଠିଥିଲେ ।